Gägend un Ümwelt 1400 bet 1450

Klei un Leim gifft dat in Mäkelborg naug. Teigel in dat „Klosterformat“ warden för Kirchen un för normale Hüüser nahmen. Besünners bläuht de Handwarkskunst vun dat Teigelmaken in de Buughütten, wo sei ut mäkelborg‘schen Klei wunnerbore Formteigel maken. Disse Formteigel warden in Gewölwerippen un as Zierrat an Süülen in Kirchen verbuugt.

Tau‘n Teersengeln, worut denn Pick makt wüür tau‘n Kalfatern un Schmeeren, bruukten sei bannig väl Bäukenholt. De Müggenburger Teeraben bi Torgelow gifft dat noch as Flurnamen. Holtkahlen wüürn ut Holt bi‘n Köhler sengelt. Dat is nu all tau seihn, dat miehr Holt verbruukt ward, as Bööm nahwassen daun. Inschränkt ward dat Holtschlahn œwer nu noch nich. Up ‘ne anner Oort ward väl Holt dörch Brand upfräten.