Gägend un Ümwelt 1300 bet 1350

De välen Glashütten maken Waldglas, wat sick gaud verköpen lött. Dorför bruuken sei Quarzsand, den sei hier finnen. Oewer üm den Sand tau schmölten, bruukt dat bannig hohge Temperaturen. De kriggt‘n blot, wenn‘n mit Hartholt inbäuten deit. Eiken un Bäukenbööm warden bannig väl afhaugt un för de Glasmakerie verbrennt. För de Schwien blieben de Eikenhollen, wo sei häud’t warden un sick an Eikeln dick un mastig fräten.

Dat "Holtrecht" is ein Privileg vun de Grundherren, dat heit vun de Herzög‘ un de Landeddellüüd. Mit Holt kann’n väl Geld maken. Wenn de Lüüd Holt klauen, gellt dat as "Holtfrevel" un bringt bannige Strafen in, ok wenn de Lüüd blot Telken nähmen, de dalfollen sünd orrer Bööm, de ümkappt wieren.