Religion 1450 bet 1500

Dat weltlichen un de kirchlichen Saken vermengelieren sick. Herzog Magnus will 1483 de Rostocker Jakobikirch in ein Domkollegialstift ümwanneln un so miehr Influss up de Stadt gewinnen. De Striet mit de Stadt duert acht Johren.

1492 warden 20 Stiernbarger Juden verbrennt. Sei warden beschülligt, dat sei Hostien kaputt staken hebben. De annern Juden warden ut dat Land schmäten. De Hostien kriegen as „heiliget Blaut“ ‘n Platz in de Pfarrkirch vun de Stadt. Gägen Enn vun‘t Middelöller maken väle Lüüd Wallfohrten as Teiken för ehren Globen. Pilgers trecken dörch Europa. Väle Lüüd stiften för Kirchen un Kapellen. Sei glöben, dat ward ehr för nah den Dod anschräben, wenn sei in‘t Läben wat Gaudet dahn hebben.

Weltlich un kirchlich Läben vermengelieren sick. De Herzog Bogislaw X. kriggt dat fardig, dat hei dat Recht hett, de boebelsten kirchlichen Ämter tau besetten, bi de Insettung vun Pasters mittauschnacken un hei kriggt de groten Feldklösters ünner siene Fuchtel. Gägen dat dickdaunsch, weltlich Läben vun de Kirchenlüüd beschluten sei 1492 bi de Synod‘ in Stargard, dat wecker so lääft, bannig Straf kriegen sall.

Bogislaw X. beschnitt 1481 dat Recht vun de Juden, sick in Pommern uptauhollen. 1492 warden 20 Juden ut Stiernbarg verbrennt. Ehr ward nahseggt, dat sei inweihchte Hostien kaputt staken harden. De Herzog is bi disse Saken vörnweg dorbi un jagt denn de Schutzjuden ut Pommern rut.

Bet tau dat Enn vun dat Middelöller is dat in de kirchlich Mod‘, up Wallfohrten tau gahn. Dörch Europa trecken Pilgers. Väle Kirchen un Kapellen kriegen ollig väle Seelgerätstiftungen.