Modell vun dat Motorfrachtschipp Typ IV FRIEDEN

• Maßstab: 1:250
• in de Farwen so as de Warft ehr utliefert hett: schwatt/ rod
• 65 cm lang
• Modell buugt vun Jürgen Schlanstedt, Halberstadt

För den Niegbuug vun Hannelsschäpen, de de DDR nödig bruukt, brüüden sei in den VVB Schippsbuug an Anfang vun de 1950-er Johren ein Programm ut, dat vier Schippstypen enthöllt. De Typ, den sei in dat Johr 1952 plant hebben, is ein Motorfrachtschipp, wat 10.000 Tunnen drägt. In’n Oktober ward dat ierste Schipp vun den Typ FRIEDEN up Kiel leggt. Dree Johren buugen sei doran un in den Juni 1957 ward dat an de Düütsche Seereederei utliefert. Bet 1978 führt de FRIEDEN ünner de Flagg vun de DSR in den Liniendeinst nah Asien, Afrika un Lateinamerika.

De Schippsbuuger vun de DDR hebben dat bi dat Buugen bannig schwor. Material hebben sei tau wenig, dat ward nich naug tauliefert un de technische Utrüstung is up de Warnow-Warft, de noch gornich fardig buugt is, ok nich tau bruuken. So koenen sei oewerhaupt nich vernünftig buugen. De Staat schrifft denn ok noch vör, dat sei dat Schipp buugen sallen, ahn dat dor Material ut dat Utland för bruukt ward. So klamüstern sei sick niege Technologien un Schippsutrüstung ut un ‘ne eigen Industrie, de tauliefert, kümmt in de Gäng‘. De gröttsten Nücken gifft dat oewer, ‘ne Hauptmaschin‘ tau finnen. In de DDR gifft dat nämlich gor keinen, de grote Schippsdieselmaschinen buugt! In de Not buugen sei twei Dieselmotoren up twei Wellen in. So loopen de Schäpen mit vier (!) Hauptmaschinen ut dat EKM Halberstadt. Bet 1961 warden 15 Schäpen vun dissen Typ för de Ostasienfohrt buugt, 12 för de Düütsche Seereederei Rostock (DSR) twei för China un eins för Kuba.