Schippsmodell Fleigerbetriebsboot FLB 519

• Yacht- un Motorbootswarft Gebr. Kröger Rostock-Warnmünn 1941/42
• Maßstab: 1:40
• 55 cm lang
• Modell buugt vun Adolf Saalmann, Hamborg

Ofschonst graden de Krise in de Weltwirtschaft in Gang is, grünnen de Bräuder Hans un Karl Kröger 1928 de Gebr. Kröger Yachtwarft in Warnmünn. In de iersten Johren buugen sei lütte Boote un Seilboote. 1931 hebben sei einen Utscheid för Konstruktion vun den Düütschen Seilschipperverband gewunnen. Mit den Siegerentwurf vun ‘ne Scharpiejolle warden sei in de Welt anerkennt un kriegen bannig väl Updräg‘ för Sportjachten, Rettungsboote un Polizeiboote. Nahdem de Nationalsozialisten 1933 an de Macht keemen, hebben sei miehr Geld för de Rüstung utgäben. So kriggt de Warft denn vun 1937 an Updräg‘ ut dat Rieksluftfohrtministerium, üm Fleigerbetriebsboote (FLB-Boote) tau buugen.

Rasch hebben de Nationalsozialisten de Luftwaffe utbuugt un so bruuken sei för de Säkerheit vun de Fleigerie un dorför, oewer See afstörte Fleiger un de Piloten tau retten, Fleigerbetriebsboote mit miehrere Motoren. (FLB-Boote) De Kröger-Warft klamüstert miehrere Bootstypen ut för dat „Kommando Schäpen un Boote“ vun de düütschen Luftwaffe in Kiel. As de Krieg utbraken is, buugen sei bi Kröger oewerhaupt keine zivilen Schäpen miehr, sünnern warden tau ‘ne klore Rüstungsfabrik. In den Verloop vun den Krieg warden ümmer miehr vun de Facklüüd tau’n Kommiß intreckt. Sei hebben Mangel an Arbeitslüüd un so nähmen sei bi de Krögerwarft vun 1943 an utländisch‘ Zwangsarbeiters, KZ-Häftlings un sowjetisch‘ Kriegsgefangene. Fuurts hebben's gor kein Möglichkeit miehr, de Produktschion in Warnmünn uttauwieden. Dormit sei oewerhaupt noch dat buugen koenen, wat bestellt is, gäben sei Lizenzen för den Buug vun de FLB-Boote nah Dänemark, Holland un Frankriek. In Stralsund maken de Krögers noch eine Warft up. Bet tau dat Enn vun den Krieg buugt Kröger üm 1.000 zivile un militärisch‘ Fohrtüüch.