Maerten de Vos: Einhuurn

• 1572, Öl up Holt, 137 cm hoch

Ne ganze Reihg vun Biller vun läbensgrot malte exotische Diere hebben de Herzög vun Mäkelborg nich ierst, as Oudry sei malt hett. All 1576 sünd teihn so‘ne Biller vun Mearten de Vos, de ‘n groten Meister ut Antwerpen is, in einen Ruum in dat Schwerin‘sche Schlott in de Wandtäfelung inbuugt worn. Söss dorvun, de 1572 malt sünd, gifft dat hüüt noch. Vier wedder dorvun hett hüüt dat Staatlich‘ Museum in Schwerin. Dörch ‘n Tüügnis vun 1576 weiten wi, dat de Biller eigens för Schwerin malt sünd. Doran kann ‘n seihn, wat de Herzog Johann Albrecht I. för‘ne Ansprüch harr, oewer ok, dat de Kultur in Mäkelborg mit den Nuurd-Ostsee-Ruum tausamenhüüren deit. De Nedderlänner hebben de Näs dorbi nämlich vörn.

Maerten de Vos hett ok all för Herzog Wilhelm den Jüngeren vun Bruunschwieg-Wulfenbüttel de staatsche’ Schlosskapell utmalt. Nu will de Mäkelborger dor mithollen un lött sick disse „Wunsch-Menagerie“ malen. Dat hüürt bi de Herzög un Fürsten tau den gauden Ton, sick exotische Diere tau hollen un ok so’ne Biller tau sammeln. De Schwerin‘sche Herzog is nu bannig plietsch: Hei kriggt mit dit Bild ‘n nieget Kunstwark vun den Antwerpener Maler in de Sammlung un hei kriggt ‘n bannig exotisch‘ Diert in siene Menagerie, denn kein anner Fürst hett ‘n Einhuurn in siene Sammlung!