Carel Fabritius, De Duurwächter

• 1654, Linnen, 67,5 cm hoch

In dat Johr 1807 is Mäkelborg ünner de Herrschaft vun de Franzosen. De Herzog is nah Altona utneiht. De Direkter vun dat Museè Napoleon nützt dat glieks ut un nimmt den „Duurwächter“ un ok noch 200 anner Biller mit lange Fingers ut dat Schlott Schwerin mit nah Paris. Ierst in Paris ward de Signatur frieleggt. So ward de Künstler rutfunnen, de vörher noch nich bekannt wier. Hei kriggt nu siene Anerkennung. Dat markt‘n ok glieks doran, wo düer de Biller sünd. Oewer blot soeben Johren later, vun 1814 an, hüürt Mäkelborg tau de europäischen Länner, de sick ehre Biller ut Paris trüchhalen.

Denn oewer vergäten de Lüüd, de sick mit Kunst befaten, wo dat Bild „De Duurwächter“ eigentlich afbläben is. As William Thorè-Bürger in de 1860er Johren den Katalog mit all de Biller vun Carel Fabritius tausamenstellt, kennt hei dat Bild blot noch vun‘t Hüürenseggen. Liekers seggt hei, dat dat eins vun de wichtigsten Biller is. An diss Geschicht‘ kann‘n de kulturgeschichtlich‘ Laag vun Mäkelborg in dat 19. Johrhunnert tämlich gaud afläsen. Dat Bild wier in Schwerin, oewer de Kunstwelt hett gloewt, dat dat verluuren is.