Nackwarwel vun ein Neoichthyosaurier

• funnen in ein Lias-Kleikuhl in Grimmen,
  so bi 183 Millionen Johren olt,
  3,3 cm hoch

Den fossilen Nackwarwel hett Hartmut Schneider, de ein vun de Maaten bi den Museumsbirat un Geolog‘ is, schenkt. Hei hett den Nackwarwel in ‘ne olle Kleikuhl funnen un hett em 1987 dat Heimatmuseum Grimmen schenkt, wat jüst grünnt wier. De Warwel süht ganz un gor so ut, as wenn hei tau de Nackwarwels hüürt. Dat kann ein nah sien Utseihn seggen, oewer ok doran, wo de Rippen an em ansett wieren. Disset fossile Fundstück is würlich ein raret Exemplar un dormit kann’n wiesen, dat disse Diere in de Tiet vun dat Ünnerjura hier in’n Nuurdosten läwt hebben.

De Sedimente, de sei in de Kuhl funnen hebben, hüüren tau dat Ünnerjura, dat kann’n seggen. Vör 200 Millionen Johren wieren all de Kontinenten noch tausamen in ein grote Landmass: Pangäa. De gröttste Deil vun Middeleuropa wier ünner eine siede, grote See. Disse See leech so bi 30° bet 40° nüürdliche Breit un harr verschieden Becken, siede Gägenden un ok Inseln. Dat Klima is subtropisch west. De ünnerjurassischen Sedimenten bi Grimmen hebben sick aflagert, man tau de Tied wier dat so bi 150 bet 200 Kilometers vun de Küst vun Skandinavien wech.

De ünnerjurassischen Sedimenten bi Grimmen sünd besünners bekannt wuurden wägen de bannig verschieden fossilen Diere, so as Ammoniten, Belemniten, Fisch un ok Oewerreste vun Seereptilien so as Krokodile un Ichthyosaurier.

Ichtyosaurier, de ein ok Fischsauriers nömen kann, sünd Reptilien ut dat Ierdmiddelöller, de sick bannig genau an dat Läben in’t Water anpasst hebben. Dat Lief vun de seehg ut, as hüüt de vun Haie orrer Thunfisch. De Extremitäten achtern un vörn hebben sick tau Stüerflossen trüchbill’t. De vertikale Schwanzfloss süht ut as’n halwig Maand un drifft dat Dier an. Ichtyosauriers hebben an leiwsten Ammoniten un Belemniten fräten, oewer ok Fisch un anner Seereptilien. Sei hebben bannig grote Oogen hatt. So kann’n sick denken, dat sei dat, wat sei fungen hebben, ok in de deipe See jagt hebben. De Warwel vun de Ichtyosaurier sünd platte Schiewen. De Neuralbagens, de mit den Warwel üm den Rückenmarkskanal sitten, gifft dat in Tüüchnisse oewer fossile Fundstücken nich so oft.