Skipnavigation Virtuelles Museum zur Geschichte Mecklenburgs und Vorpommerns

Springe direkt zu:

Menü öffnen
Politik | 1750 bet 1800 | Vörpommern bet 1945

De Landkort "Carta öfwer Pommern och Rügen"

Bild
  • mit de Hand teikent up Papier, Ünnergrund ut Textilien,
    1756–1763,
    130 cm lang

In dat Heimatmuseum Grimmen hebben sei ein bannig wichtiget Tüüchnis ut de Tied vun den Söbenjöhrigen Krieg. Dat is ‘ne schwed’sche Landkort ahn ein Datum up, de Vörpommern wiest un in den Maßstab so bi 1:145.000 teikent is. Sei is utricht nah Nuurdwesten, dat heit, dat de Nuurdrichtung üm 45° verdreiht is. Dorüm liggt de Darß an de boebelste Kant vun de Kort. As de Kort teikent wüür, wier de prüßisch‘ Habenstadt Swinemünde noch jung un so is sei verkiehrt up de rechtsche Siet vun de Swine inteikent. Dat kann angahn, dat de Kort teikent wuurn is, as de schwed‘schen Regimenter statschioniert wüürn orrer as de Generalstab vun Stralsund nah de verschieden Kriegsgägenden dörchtreckt is. Kann ok angahn, dat de Kort in dissen Söbenjöhrigen Krieg twüschen Schweden un Prüßen in de Stadt trüchbläben is.

Besünners an disse Kort is, dat de heile Gägend vun Westpommern inteikent is, so, as dat bet 1679 orrer ok 1720 west is un alens ünner de schwed’sche Fuchtel stünn. Ok inteikent sünd de Gägenden in den Süden vun de Peen, de Insel Usedom un Wollin un ok de Städte längs dat achterpommersch‘ Äuwer vun Dievenow, Stettischet Haff un Oder. Dat wiest, wat dat wichtigst Ansinnen vun den Krieg wier: dat Schweden de Gägenden wedder trüch kriggt, de sei 1720 so ungeschickt in den Nuurdischen Krieg nah Prüßen hen verluuren hebben. Ok de Gägenden achter de Recknitz un de Trebel in den Osten vun Mäkelborg un ok de Nuurden vun de Uckermark, wo de Schweden ofteins in dissen Krieg rümtreckten, sünd nipp un nau inteikent. Besünners ok de Symbole vun de Kartusche wiest, dat sick dat üm eine Militärkort hanneln deit.

Erhard Gagern ut Grimmen hett de Kort 1990 dat Heimatmuseum schenkt.

Text: H. T. P

Dat Originalutstellungsstück finnst du hier:

Museum Im Mühlentor Grimmen

Dit Utstellungsstück hüürt tau:

Schlachwuurt/-wür:

  • Kort

Anner Utstellungsstücken mit dit Schlachwuurt

Kontakt

Museum Im Mühlentor Grimmen

Mühlenstraße 9a
18507 Grimmen