Politik 1950 bet 2000

1952 warden ut Mäkelborg de Bezirke Rostock, Schwerin un Niegenbramborg makt. Politisch hebben de Bezirksleitungen vun de SED dat Seggen, de ehre Order ut Berlin kriegen. De Rat vun den Bezirk hett dor dat Leit för de Wirtschaft un de Verwaltung.

An‘n 17. Juni 1953 streiken de Arbeitslüüd in de grötteren Bedriebe dorför, dat de Wahlen frie afhollen warden, Gefangene frie kamen un ok dorför, dat de Normen bi de Arbeit dalsett warden. Bäten wat dorvun ward erfüllt, oewer de Anführers vun de Streiks kamen in‘t Kaschott.

In de Johren 1958 bet 1975 warden in den Bezirk Rostock de „Ostseewochen“ afhollen. Dat sall ok dorbi helpen, dat de DDR völkerrechtlich anerkennt ward. Vun dat Johr 1958 an bewacht de „Grenzbrigade Küst‘“ den Nuurden. Siet 1961, as de Muer in Berlin buugt is, hüüren de tau de „Grenztruppen vun de NVA“. Dat MfS kontrolliert de Grenz un de Oewergäng un ok de Lüüd, de in‘t Land läben.

De Sowjetarmee is 30 km vun de Grenz af stationiert. In Laag un Güstrow warden Plätz buugt, wo Militärfleigers wechfleigen un dalkamen koenen.

In Rostock baldowern sei sick 1959 de „Ferienwelle“ vun Radio DDR ut, wat dat gröttste Regionalprogramm is. 1962 buugt dat DDR-Fiernseihn dat Ostseestudio Rostock up. Gägen de Politik vun de SED demonstrieren de Lüüd in Rostock vun den 19.10.1989 an. Nah de Demonstratschion geiht dat tau dat „Bäden för Fräden“. Dat „Niege Forum“, dat sick noch gornich so dull organisiert hett, makt Proteste ok in anner Städte. De „Runnen Dische“ klamüstern sick niege demokrat‘sche Formen ut. De verschieden Parteien billen sick rut.

1990 ward dat Bundesland Mäkelborg-Vörpommern nieg billt un Schwerin ward de Lanneshauptstadt. De beiden iersten Regierungen sünd vun de CDU anführt, siet de Tied kümmt de Ministerpräsident jedet Mal vun de SPD.

De vörpommerschen Gägenden gahn 1952 in de Bezirke Rostock, Niegenbramborg un Frankfurt/Oder mit rin. De Länner wüüren uplöst. Dat politische Seggen hebben de Bezirks- un de Kreisleitungen vun de SED, de blot maken, wat sei vun Berlin anseggt kriegen. De Kreise un Bezirke warden regiert vun je ein Rat, de de Wirtschaft un dat Verwalten lenken deit.

As niege Kreise makt warden, ward up de historischen pommerschen Grenzen nix gäben.Besünners dull is, dat de Städte Ribnitz un Damgorten tau ein Stadt tausamenleggt warden. De Stadtkreis vun Stralsund is dat einzigst, wat Bestand hett. De Ostseewoch vun de Ostseelänner sall in den Bezirk Rostock ünnerstütten, dat de annern Länner de DDR vun dat Völkerrecht her anerkennen sallen. 1984 kümmt de schwed’sche Ministerpräsident Olof Palme nah Stralsund up Besäuk. Erich Honecker is ok dorbi.

1989 maken sick Lüüd ut’n Nuurden up, för Fräden tau bäden un demonstrieren achteran gägen de Politik vun de SED. Dat Niege Forum, dat sick blot locker tausamenschlaten harr, organisiert ok Protest in verschieden Städten. An den 18. Oktober 1989 grünnt sick in Stralsund de ierste SPD-verband vun de drei Nuurdbezirken.

Niege Formen vun Demokratie warden utprobiert un so ward sick in de Kommunen an Runnen Dischen ünnerhollen. 1990 ward dat Bunnesland Mäkelborg-Vörpommern nieg grünnt un Schwerin ward Lanneshauptstadt. De Lannesverband Vörpommern e.V. sett sick för ein eigen Bunnesland Vörpommern in, kümmt oewer nix bi rut. De iersten beiden Regierungen warden vun de CDU anführt. Vun 1998 an kümmt de Ministerpräsident/in ut de SPD.