Staatschen Schmuckpokal mit den witten Adlerorden

• Sachsen, üm 1760, Glas, schnäden, taun Deil vergollt un anmalt, 33 cm hoch (schenkt vun Karl-Heinz-Denkinger 1997)

De Orden vun den witten Adler is de höchst‘ Utteiknung vun de Iersten Republik Polen (1569–1795). 1705 stift‘ August de Starke diss Iehrenteiken un hett sick dorbi ‘n Ogenspeigel bi den Schwatten Adlerorden vun Prüßen nahmen. In dat boebelst‘ Wappenkrüüz steiht schräben: Pro fide, rege et lege – Für‘n Globen, König und Gesetz. De Initialen AR up de Achtersiet stahn för Augustus Rex. Ut dat Huus Mäkelborg warden twei dormit utteikent: Herzog Adolph Friedrich IV. un sien Brauder Georg August Herzog tau Mäkelborg.

Den Schmuckpokal, den sei dortau kriegen, is antauseihn, dat de Orden vun Bedüdung wier. De Orden un de Pokal warden in dat Schlott in Niegenstrelitz utstellt. As dat Schlott 1945 in Trümmer geiht, sünd binah all de Schätz‘ vun dat Lannesmuseum verluuren. De staatsche Schmuckpokal oewer leeg in den Schutt un wier heil bläben. 1997 kümmt hei in dat Museum Niegenstrelitz.