Chanukkalüchter

• Messing, 1. Hälft vun dat 20. Johrhunnert, 14,8 cm hoch, schenkt vun den Lannesrabbiner Dr. William Wolff (1927-2020)

De jüdisch‘ Chanukkalüchter hett acht Arms un einen, de nah vörn wiest. Dat is de Schammes (de Deinstmann) för dat Licht tau‘n Ansticken. Dormit ward bi dat Chanukkafest (Fest för de Tempelweihe), wat 8 Dag geiht, jeden Dag ein Talglicht anbrennt – bet an den 8. Dag all de 8 Lichter up den Lüchter brennen.
William Wolff un sien Twäschenbrauder (1927 in Berlin buurn) krägen 1930 jeder so‘n Lüchter schenkt. 1933 emigriert de Familie Wolff nah Amsterdam un later nah London. Dor ward William Wolff Journalist un arbeit‘ för den Daily Mirror. 1984 kriggt hei de Semicha (de rabbinisch‘ Ordination).

Vun 2002 an warkt hei in den Lannesverband vun de Jüdischen Gemeind‘ in Mäkelborg-Vörpommern. 2012 schenkt hei sienen Lüchter un den Lüchter vun sienen Brauder dat Jüdisch‘ Museum Hagenow. Dordörch stahn de Lüchters ok för den niegen Anfang vun dat jüdisch‘ Läben in Mäkelborg-Vörpommern nah den Fall vun de Muer. De Rabbiner Dr. William Wolff as grote Persönlichkeit prägt dat jüdisch Läben hier un kümmert sick geistlich dörüm.