Spälstein (Moehl orrer Schach?)

• Enn vun dat 12. Johrhunnert
• Geweih
• Crivitz
• 2 cm hoch

De lütte Figur mit de konischen Statur up ‘ne runn‘ Grundfläch‘ hett fiene Ritzteiknungen as Schmuck, so as Oogen un Linien un hett an den „Kopp“ ok twei lütte „Uhren“, wat ein Tiersymbol vörstellen sall. Un würklich: dat hannelt sick üm twei lütte Hüürn. Ganz genau sall dat ‘ne Schachfigur sien, de ‘n Strietelefanten dorstellt. Hüüt is dat de Lööper in‘t Späl. De Hüürn sallen de Stöttähnen vun den Elefanten sien. Schach un Moehl sünd mit de düütsche Kolonisierung as Späle vun de Edellüüd bekannt. Disse Strategiespäle sünd dörch de Kooplüüd nah‘n Nuurden vun Europa kamen un hebben sick fuurts utbreit‘.