Sowjetisch Militärhelm

• Stahlblick
• Rostock
• 1940er Johren

De Sathlhelm hüürt tau de normale Utrüstung vun einen Suldaten vun de Rode Armee. An den 1. Mai 1945 nimmt de 65. Armee vun de Tweite Belorussische Front de Stadt Rostock in. De NS-Herrschaft un de Krieg hebben de Stadt ganz un gor in Dutt un entwei trüchlaten. De Inwahners sünd blot noch 69.000, wat de Hälft vun vör’n Krieg is. Vun de 10.535 Wahnhüüser sünd 2611 Stück (24,7%) ganz un gor entwei un 6735 (60,5%) hebben ‘n Schaden. Theater, Post- un Telegrafenamt, Gerichte, Landratsamt, twei Krankenhüüser, acht Schaulen, Petri-,Jakobi- un Nikolaikirch sünd kaputt. Ok Stein-, Petri-, un Kauhduur sünd in Dutt, de Versorgung un de Stratenverkiehr sünd tausamenbraken. De iersten Anordnungen vun de sowjetischen Frontkommandatur in dat Hotel „Rostocker Hoff“ gellen de öffentlichen Ordnung.

An den 3. Mai 1945 träden de Maaten vun de KPD un de SPD ünner de Leitung vun den Kommunisten Hans Mahncke in Verbinnung tau den Frontkommendanten. Sei billen ein Komitee för Ordnung un willen verhinnern, dat Rostock utplünnert ward. An den 5. Mai warden de NSDAP un all ehr Organisatschionen verbaden un de olle Verwaltung ward uplöst. Dat Läben ward dörch Orrer un Befähl rägelt. An den 9. Mai ward Christoph Seitz Böbelster Börgermeister. De Upgawen för de niege Verwaltung sünd Normalisierung vun dat Läben. Uprüümen, Aftakeln vun Befestigungsanlagen, Sorg för Äten un Drinken, Säkern vun den Besitz vun de NSDAP-Lüüd, de utneiht sünd. Dortau hüürt ok, sick üm de tau kümmern, de up de Flucht sünd un de kein Dack miehr oewer den Kopp hebben.