Ahnentafel vun den Herzog Ulrich tau Mäkelborg

• Cornelius Krommeney (storben 1599) Ahnentafel vun den Herzog Ulrich tau Mäkelborg, 1593, Öl up Linnen, 105,5 x 96,5 cm

De Ahnentafel hüürt tau ein vun de Utstellungsstücken ut dat Schlott Güstrow, de dat gröttst Bedüden in de Geschicht vun dat Land hebben. Sei is 1593 vun den Nedderlänner Krommeney mit so‘n fienen Pinsel malt, dat noch hüüt ein grot Vergnäugen is, sick dat tau bekieken: De Reihg vun de Wappenschilde, de Figuren, de fienen Telken mit‘n Schwung, de de einkelnen Mitglieder vun de Familie oewer fief Generatschionen tausamenbringen.
As Ulrich (1527–1603) in den Arwschaftsstriet gägen sienen Brauder Johann Albrecht I. (1525–1576) dörchsett, dat hei ok mitregiern dörf un hei denn Güstrow as Residenz kriggt, möt hei nahwiesen, dat hei‘n Recht up disse Herrschaft hett. Disse Nahwies möt för ewig gellen, för de de nu läben un för de, de nah em kamen. So‘ne genealogischen Inszenierungen sünd ok in de Mod‘.

Dat wie ok nödig, üm sick in den Kring vun de boebelsten Rieksfürsten dick tau daun un ok üm bi de Hochtiedspolitik mittaumischen, de vun Vördeil wier. Ok üm in ein Ridderorden orrer ein Domkapitel mittaumaken, möt ein 16 Eddellüüd as Ahnen nahwiesen. De Herzog gifft den Updrag an den Humanisten David Chyträus (1530–1600), de Perfesser an de Universität Rostock wier. Hei forscht de Ahnenreihg vun Ulrich rut. Ulrich siene Vöröllern stammen vun de Hüüser Mäkelborg, Bramborg, Sassen, Pommern, Schleswig-Hollstein un Dänemark.