Von de Räte tau ein Parlament

Dat de Arbeiter- un Suldatenräte dat Seggen harrn, güng in Gang’ vörbi. Denn nu würn Wahlen in dat Riek, in all Länner un Friestaaten vörbereit’, üm de verfatungsgäbend’ Versammlung tau wählen.

Vör de Wahlen hebben sik ok niege Parteien grünn’t.

So ward in de Stralsundschen Zeitung von denn 15.Dezember 1918 upraupen, denn Kreisverband von de Düütschnationale Volkspartei tau grünnen.

An denn 18.Dezember 1918 fünn de Wahl tau de verfatungsgäbend’ Versammlung in denn nieg grünn’ten Friestaat Mäkelborg-Strelitz statt, in Mäkelborg-Schwerin un Prüßen folgten de Wahlen an denn 26. Januar 1919, dat wier ein Woch vör de Wahl in dat heile Riek.

In de Greifswalder Zeitung von denn 28. Januar 1919 ward bekanntgäben, woans dat för de Stadt un denn Kreis Greifswald utgahn is: Hier - un ok in heil Prüßen, Mäkelborg-Schwerin un Mäkelborg-Strelitz - licht de Sozialdemokratisch’ Miehrheitspartei vörn. Œwer anners as in denn Friestaat Prüßen kümmt de konservative DNVP up denn tweiten Platz. Lanneswiet wieren de blot up denn vierten Platz.

Ein Anteiken dorför, dat Düütschland na de Wahlen nich up ruhige See ünnerwägens wier, is de Anzeich ut de Greifswalder Zeitung von denn 31. Januar 1919. Dat „Freiwillig Lannes-Jäger-Korps“ - ok belannt as dat Freikorps Maercker - söcht Ünnerstüttung un Maten, de „Olle Frontsuldaten“ wieren. Sei sallen helpen, dat Vadderland tau retten.