• Tiedstück: 1450 bet 1500

1450 bet 1500

Borg Neustadt-Glewe Borg Neustadt-Glewe

Lannesdeil Mäkelborg

1471 bliwwt Herzog Ulrich II. dod. Dat Land Stragard ward Mäkelborg tauschlahn. Vun 1483 bet 1503 hett Herzog Magnus allein dat Seggen. Hei sortiert de Finanzen, qualefiziert de Beamten un bringt de Verwaltung up Schick. De Städte an de See blieben mastig un stark. Up’n Markt in de Stadt ward nu ümmer miehr mit Geld inköfft. Up dat Land warden Woren eihrer mit Woren orrer anner Naturalien betahlt.  In de late Gotik warden so’ne besünneren Saken buugt as de Nikolaikirch in Wismar.

1492 warden 20 Judenminschen in Stiernbarg verbrennt. De warden anschülligt, dat sei hillige Hostien kaputtstaken hebben soelen. De annern Judenminschen warden ut dat Land jagt. Tau de Hostien in de Stiernbarg’sche Pfarrkirch kamen nu Lüüd pilgert, de sei as "Hilliget Blaut" iehren.

"Rubenow-Tafel" in den Greifswalder Dom
för de Grünner vun de Universität,
 üm 1460

Lannesdeil Vörpommern

Bogislaw X. bringt dat Herzogtum wedder tausamen. Hei schafft dat, dörch klauke  Friegerie in de Dynastie sick mit de Nahwers gaud tau stellen un tau verdrägen. Hei bringt de Verwaltung up Schick, führt dat Röm’sche Recht in un de Aktenführung. Hei sett sick sülwst up de Höchsten Kirchenämters, hett ok dat Recht bi de Besettung vun Pasters mittauschnacken un schafft dat, de groten Feldklösters vun sick afhangen tau maken. De Macht vun de grötteren Städten schafft hei oewer nich kaputt tau kriegen.

1456 ward de Universität Griepswold mit de juristischen, de medizin’schen, geistlichen un artistischen Fakultäten grünn’t. De Soehns vun de Rieken warden in Geliehrtenschaulen för de Universität vörbereit‘.

In de late Gotik warden so besünnere Saken buugt, dat sick heil Europa doran ‘n Ogenspeigel nähmen künn. In Stettin buugen sei dat Radhuus fardig. De Familie vun de Schulenburg lett in Penkun ‘n Schlott buugen, dat mit de Schlötter vun de Herzogs mithollen will. Disse Gebüügt warden mit Dackteigel indeckt. All anner Hüüser hebben Stroh- un Rohrdäcker.

Wegge wiesen will, dat hei ollig fast gloewt, geiht up Wallfohrt. För Kirchen un Kapellen ward ollig stift‘. De Synod‘ vun 1492 drauhgt de Geistlichkeit mit dulle Strafen, wiel de so schwulstig un weltlich läben daun.

Herzog Bogislaw X. treckt 1481 de Juden dat Recht hier tau läben af. Dornah jagt hei de Schutzjuden ganz un gor ut Pommern rut.

vörwards

Miehr Utstellungsstücken 1450 bet 1500:

(Wähl di 'n Utstellungsstück orrer 'ne Tied ut.)