Dynastie 1650 bet 1700

Christian (Louis) I. <br> üm 1670 Christian (Louis) I.
üm 1670

Lannesdeil Mäkelborg

Herzog Christian de I. (Louis) kümmt 1658 up den Thron vun den Landesdeil Mäkelborg-Schwerin, de wirtschaftlich rungscheniert wier. De miehrste Tied höllt sick diss griesmuulig‘ un krakeelsch‘ Fürst an den Hoff vun den Sünnenkönig Ludwig den XIV. in Paris up. Hei blifft 1692 in Holland dot, ahn dat hei ‘n Soehn hett. Dat Regier’n in Schwerin oewernimmt sien  Brodersoehn/ Süsterjung Friedrich Wilhelm. Mit den Dod vun Gustav Adolf starwt de Güstrow’sche Linie 1695 ut. Dunn kriegen sei sick för ‘n poor Johren mit Adolf Friedrich den II. in de Prüük wägen de Arwschaft.

Sebastien Bourdon: Königin Christina von Schweden 1653 Sebastien Bourdon: Königin Christina vun Schweden 1653

Lannesdeil Vörpommern

De Schwed’sche Königin Christina (1622–1689) ward 1653 de Herrin oewer dat Land linksch vun de Oder, Stettin mit dormang. Weil dit Fürstentum in dat Heilig‘ Römisch‘ Riek vun düütsche Nation mit in is, kriggt sei ok ‘ne Stimm in den Rieksrat. Vun 1644 an is sei all Königin, ehre Kron kriggt sei oewer ierst 1651. 1654 dankt sei af un ehr Vetter Karl X. Gustav (1622–1660) oewernimmt dat Regieren vun ehr. Nah em kümmt sien Soehn Karl XI. (1655–1697) an de Reihg. Hei is oewer noch minnerjöhrig un so regiert siene Mudder mit fief Beamte bet 1672. Dunn is hei vulljöhrig worden.