Gägend un Ümwelt 1600 bet 1650

Nu entstahn ierste Bäuker, in de schräben steiht, dat de Minsch in Fräden mit de Natur läwen süll. Sei stellen ok fast, dat tau väl Bööm afschlahn warden. Œwer sei gäben noch nich vör, dat‘n wedder wat nahplanten möt. De Lüüd glöben, Holt gifft dat in Mäkelborg naug. Johannes Coler gellt as de ierste Schriewer vun ein „Forstliehrbauk“ in Mäkelborg.

Bi denn Kriegsmarsch vun denn Schwedenkönig Gustav II. Adolf dörch Pommern schlahn siene Truppen heile Wälder af för den Buug vun Palisaden, mit de sei ehre Lagers afschotten daun. Väl Bööm warden ok tau‘n Böten nahmen. Heile Gägenden warden plattmakt un -schaben, blot dat sei tau‘n Scheiten wiet kieken kœnen.