Schriefgarnitur mit Fedderschal

Stralsunner Fayencemanufaktur, 1769,
bunt Keramik, vigelett staffiert, düütsch streute Blaumen; De Muschelschal is dwars oval un up de Ierdformatschion sind utstreute Blaumen in Blag, Vigelett; de Kant is gräun un gäl, mit vigeletten Binnenstriepen, de so utfeddert is

Fayence is Steintüüch mit ‘ne witte Glasur up, de ok Tinn enthöllt. Nömt is dat nah de italiensche Stadt Faenza. Ind at 18. Johrhunnert sünd in Europa binah oewerall Scharpfüer- orrer Emaillefarwen in’n Gebruuk. In de late Tied vun de Fayence-Makerie hüürt 1755 ok de Grünnung vun de Manufaktur dörch denn Stralsunner Koopmann un Bankier Joachim Ulrich Giese. 1767 giwwt hei de Manufaktur an Johann Eberhard Ludwig Ehrenreich. Mit em vöran wasst de Fabrik tau ein vun de gröttsten Keramikwarkstäden in denn Ostseeruum. Tau ein vun de Prachtstücken tellt sisse Schriefgarnitur mit Fedderschal, Löcker för Dint un Streusand un doroewer mit‘ne Frugensfigur, de sick up denn linkschen Arm upstütt‘ un so’ne Oort antiket Kleed anhett.

De anner, verluuren gahn Arm hett woll dat Gehüüs vun’ne Daschenklock hollen. Johann Otto Frantzen hett dat Stück 1768 anmalt. Glasiert hett dat Johann Ullström. Dat Modell för de Plastik hett de Bildhauger Friedrich Rose makt.

1792 geiht de Fabrik konkurs, wiel de Konkurrenz ut England grot is un billig un denn ok noch de Pulvertorm in de Nähg vun de Fabrik in de Luft fleigt, wat dat Gebüüd ganz un gor kaputt makt hett.

Dat STRALSUND MUSEUM hett hüüt de gröttste Tahl vun de bi dusend erhollen Stralsunner Fayencen sammelt.

vörwards

Text: R.N.

Dit Utstellungsstück hüürt tau:

Vörpommern bet 1945

Dat Originalutstellungsstück finnst du hier:

STRALSUND MUSEUM

STRALSUND MUSEUM

Mönchstraße 25-28
18439 Stralsund


museum@stralsund.de

www.stralsund-museum.de