Modell vun ein dörchschnäden Sägelschipp Rostocker Brigg

ierste Hälft vun dat 19. Johrhunnert, Maßstab: 1:50, 123 cm lang

‘ne Brigg is ein tweimastig Sägelschipp, dat 90 bet 130 Lasten twüschen 25 un 30 Meter Läng‘ drägen kann. Disse Oort Hochseeschipp is gaud up all‘de Routen un ward ok vun all de Schippernationen führt. Vun alle Hannelsschäpen up de Welt is de Brigg oewer väle Johren hen dat Schipp, wat an miehrsten führt is. In de Midd vun dat 19. Johrhunnert läben de Seefohrt un de Schippsbuug up. Dat kümmt dorvun, dat dat in’t Inland keinen Toll un keine Stüern för den Schippsbuug miehr gifft. In Rostock bläuht de Hannel mit Kuurn in dat Utland bannig up. De Schipper bestellen ümmer miehr niege Schäpen. Oewer de poor Warften an de Ostsee koenen dat gor nich miehr so fix utliefern. In de Tied twüschen 1849 bet 1853 grünnen sick nägen niege Warften in Rostock. Sei buugen meist so gaadlige Sägelschäpen ut Holt.

De iersten Briggen, de in Rostock buugt wüürn, sünd bannig mastige Sägelschäpen. Ehre Form un ok ehre Verbänd‘ sünd oewergrot buugt. Dat Schippslief  hett nich väl Sprung un is schwatt malt un hett ‘n witt‘ Puurtenband ‘rüm.  Wegge hebben ein‘ graden Steven, anner’n ein mit’n Schwung mit’n vörbuugten Galion. Doroewer sitt de bannig lang‘ Bugspriet mit’n langen Klüverboom. De Takelasch vun ‘ne Brigg is tau de Tied up de heile Nuurd- un Ostsee begäng. De Fockmast steiht wägen dat komplete Vörschipp wiet vörn un is ofteins niedriger as de Grotmast. In de Midd vun dat Johrhunnert hett de Grotmast ‘n bannigen Fall nah achtern. Hei is bannig lang, äbenso lang orrer noch länger as de Waterlinie vund at Schipp. De beiden Masten sünd vull uptakelt, hebben twei Stengen un drägen Ünnerrahen.

vörwards

Text: P. DC.

Dit Utstellungsstück hüürt tau:

Mäkelborg bet 1945

Dat Originalutstellungsstück finnst du hier:

Schifffahrtsmuseum Rostock

Schifffahrtsmuseum Rostock

IGA Rostock 2003 GmbH
Schmarl-Dorf 40
D - 18106 Rostock

www.schifffahrtsmuseum-rostock.de