Adebor

In Mäkelborg-Vörpommern gifft dat bannig väle Vagels, nämlich 205 Oorten, de hier bräuden. In‘t Fröhjohr un in‘n Harwst sünd dortau noch väle Oorten ut‘n Nuurden tau seihn, de hier dörchtrecken, bi uns ‘ne Rast maken orrer den Winter œwer hier blieben. Tau de drütte Grupp hüüren ok de so ökelten „Niebörgers“, as de Sülwerreiher, de Nilgaus, œwer ok so‘ne, de sick verbiestert hebben, as de Gausgeier un de Rosenstar. Dat Beluern un Bekieken vun Vagels un ok de Dokumentatschion dorœwer hett ‘ne lang‘ Traditschion un is de Grundlaag‘ dorför, de Vagels bäter tau schützen un de välen Oorten tau erhollen.

Vun 1866 an ward de Naturgeschicht‘ vun uns Land dokumentiert in de Naturhistorischen Sammlungen vun‘t Land. Dor sünd binah 8000 Utstellungsstücken un dorüm is dat de Sammlung vun Vagels in Mäkelborg-Vörpommern mit dat gröttst Bedüden. De Adebor, den dat in‘t heile Land noch gifft, hüürt ok hüüt noch tau de Charaktervagels vun uns Gägend. In de Vagelsammlung gifft dat 44 Utstellungsstücken œwer den Adebor, de tau‘n gröttsten Deil ok würklich in de Utstellung tau seihn sünd.