Boizenburger Stadt - un Habenbahn, Fohrplan

Kartonpapier, de Plan is druckt: 1916, 48x41cm

De Streck is lang: 2,57 km, Fohrtiet: 7 Minuten twüschen de Statschionen "Boizenburg Stadt" un "Boitzenburg Staatsbahnhoff"

De Schienenstrang von de Bahnlinie Berlin-Hamburg, wecke 1846 upmakt worden wier, ward 3 km vun Boizenburg af buucht, wiel dat Äuwer von de Elw hier bannig hoch is. Ok sowiet af ward de Bahnhoff hochtreckt. Dorüm föddern de Lüd na korte Tiet, dat de Stadt mit denn Bahnhoff verbunnen warden sall. Dat klappt œwer ierst 1890. De Geldgäwers för de Stadtbahn is ’ne AG, de bet 1925 Bestand hett. Sei sett sik ut denn Börgermeister von de Stadt, denn Senator un drei Ünnernähmers tausamen.

Buucht würd de Streck von de Firma Lenz ut Stettin. De sünd ok de Pächters von de Streck. Dachdäächlich führen sœben Poor Tœch. De Fohrkorten möten bi denn Tochführer köfft warden un sei gellen blot an denn sülwigen Dach. Treckt ward de Bahn tauierst von ’ne Bn2t-Lokomotiv’, in de Mitt von de 20er Johren von’ ne Cn2t-Lokomotiv’. Von 1938 an ward sei andräben von ’n Triebwagen ut de Bleckeder Iesenbahn (Nr. 1, later DR.-Nr. 133 505). De hett vörn un achtern ein’ Motor, je nadäm, in wecke Richtung hei führt. SO bruukte hei nich ümtauwennen. Na denn Kriech steiht de Stadtbahn ünner dat Seggen von de Düütschen Rieksbahn. 1967 ward de Verkiehr von de Rieksbahn instellt. Denn Verkiehr in de Binnenstadt œwernähmen von de Tiet an Busse.

vörwards

Text: I. R.

Dit Utstellungsstück hüürt tau:

Mäkelborg bet 1945

Dat Originalutstellungsstück finnst du hier:

Heimatmuseum Boizenburg